Komuna e Prishtinës ka shpallur gjendje të jashtëzakonshme për menaxhim të mbeturinave në kryeqytet. Vendimi për shpalljen e gjendjes së jashtëzakonshme bazohet në rezultatet e arritura gjatë vitit 2024 pas marrjes së masave emergjente për përmirësimin e menaxhimit të mbeturinave.
Në një konferencë për media, i pari i kryeqytetit, Përparim Rama ka thënë se kanë angazhuar kompani private, pasi sipas tij, kompania “Pastrimi” nuk po ka kapacitet për menaxhim të mbeturinave.
“Duhet të vazhdojmë të angazhojmë kompani private që t’i ndihmojnë kompanisë ‘Pastrimi’ në pastrimin e mirëfilltë të kryeqytetit. Tash e kemi edhe infrastrukturën e qytetit inteligjent, por na duhet angazhimi i mirëfilltë edhe i kompanive private shtesë sepse përndryshe do ta kemi gjendjen si në të kaluarën”, ka thënë Rama.
Rama ka thënë se përkeqësimi është aktual në çdo hapësirë të Prishtinës, teksa ka thënë se këto janë tentativa puro – politike.
“Kemi angazhuar kompani private për menaxhim sepse 'Pastrimi' s’ka pas kapacitet ta bëjë menaxhimin e mbeturinave. Prej që ka ardhur, drejtori Bekim Brestovci gjendja është përmirësuar. Por, dikujt si duket i ka penguar, LVV-ja dhe PDK-ja me rregullore e kanë ndaluar. Gjendja kësisoj po përkeqësohet, gjendjen emergjente që e kemi shpallë do ta vazhdojmë edhe tash”, ka thënë ai.
Drejtori i Shërbimeve Publike në Prishtinë, Bekim Brestovci ka akuzuar opozitën e kryeqytetit, për pengim të tentativave komunale në raport me menaxhimin e situatës.
“Veprimet që i kemi marrë në atë kohë kanë sjellë efekt tejet të madh, por si duket ky efekt i arritur dhe tentativa jonë për të ndërtuar koncept të ri për vitin 2025 që do ta radhiste Prishtinën si kryeqytetin më të pastër në rajon ka dërguar sinjal negativ te oponentët politik dhe koalicioni në Asamblenë Komunale VV – PDK ka tentuar që t’i shfrytëzojë të gjithë mekanizmat për ta penguar një qasje të tillë”, ka thënë ai.
Punëtorët e kompanisë “Pastrimi” kishin protestuar në nëntor të vitit të kaluar para komunës, duke kundërshtuar angazhimin e kompanive private.