Sekretari i Shtetit i SHBA-së, Marco Rubio, deklaroi se Uashingtoni mbetet i angazhuar ndaj NATO-s, por kërkoi që aleatët evropianë të rrisin shpenzimet për mbrojtjen, duke theksuar se atyre do t’u jepet kohë për të arritur objektivin.
Rubio i bëri këto deklarata gjatë një takimi me ministrat e Jashtëm të NATO-s në Bruksel, duke shtuar se çdo anëtar duhet të angazhohet për të arritur deri në 5% të PBB-së për mbrojtje, raporton Reuters.
Pavarësisht tensioneve lidhur me tarifat tregtare të Presidentit Donald Trump, Rubio theksoi se SHBA-ja do të vazhdojë të jetë një mbështetje e fuqishme për NATO-n, por e bëri të qartë se aleatët evropianë duhet të kontribuojnë më shumë për sigurinë e kontinentit.
Ai nënvizoi se arritja e objektivit prej 5% do të jetë një proces afatgjatë, por rruga drejt tij duhet të jetë e qartë dhe realiste.
NATO ka vlerësuar se disa prej shteteve kryesore evropiane, si Italia dhe Spanja, ende nuk kanë arritur objektivin aktual prej 2% të PBB-së për shpenzimet e mbrojtjes./GazetaSinjali/