Parimet e sportit gjithnjë triumfojnë përballë barrierave të politikës. Por, kur është në pyetje politika serbe, sfidat thuajse janë të garantuara për këto parime universale të sportit. Kjo më së miri u pa në Kongresin e UEFA-s të mbajtur në Beograd.
Një ditë para mbajtjes së këtij kongresi, u duk se sporti po triumfon mbi politikën, pasi që në vendin e përgatitur për mbajtjen e kongresit në kryeqytetin serb, u pa i vendosur edhe flamuri i Republikës së Kosovës, krahas 54 flamujve të shteteve anëtare të UEFA-s.
Kjo bëri jehonë të madhe pasi Serbia në çdo formë dhe hapësirë e ka kundërshtuar pavarësinë e Kosovës, që nga shpallja e saj në vitin 2008 dhe shfaqja e flamurit të Kosovës atje u pa si një fitore meritore e shtetit tonë.
Por, pa u bërë as 24 orë, Serbia iu kthye avazit të vjetër. Federata e Futbollit e Serbisë, si nikoqire e Kongresit, fillimisht iu kërkoi falje gjithë qytetarëve serbë, siç tha për “lëshimin” e bërë të mërkurën mbrëma. Ndërsa, përmes një deklarate publike, i siguroi qytetarët serbë se i ka hequr simbolet e Kosovës nga Kongresi i UEFA-s.
“Organizimi i jashtëzakonshëm u zbeh nga një neglizhencë e organizatorëve, të cilën një pjesëmarrës në Kongres u përpoq ta shfrytëzonte për interesa jo-futbollistike. Reaguam së bashku, shpejt dhe me vendosmëri, dhe me përgjegjësi të plotë informojmë publikun se nuk ka asnjë flamur apo simbol të Kosovës në Kongresin e UEFA-s sot në Beograd”.
Kjo deklaratë serbe u lexua me dyshime në Prishtinë, pasi në pyetje është një Kongres i UEFA-s, në të cilën sipas të gjitha ligjeve dhe rregullave barazia dhe mosdallimet janë të garantuara.
Por, deklarata e federatës serbe u bë e besuar, kur filluan të dalin pamje prej brenda Kongresit. Madje, media të njohura ndërkombëtare si Associated Press shkrepi fotografi në momentin që dikush nga Këshilli Organizativ i hiqte simbolet e Kosovës nga Kongresi.
Pastaj, pësoi edhe fotografia tjetër nga tavolina e kreut të Federatës së Futbollit të Kosovës, Agim Ademi dhe sekretarit, Markus Weidner, që mbeti e vetmja nga të gjitha tavolinat tjera pa flamurin shtetëror.
T7 ka dërguar pyetje edhe në UEFA dhe në Federatën e Futbollit të Kosovës, por ende nuk ka marrë përgjigje.
FFK-ja dhe Agim Ademi zakonisht njoftojnë me postime për pjesëmarrje të tyre të rëndomta në aktivitete të rëndësishme të UEFA-s dhe FIFA-s.
Por, para mbajtjes së Kongresit në Beograd nuk ka pasur njoftime apo postime në rrjetet sociale nga to.