Sekretari i Mbrojtjes i SHBA-së, Lloyd Austin, tha të mërkurën se ka prova se Koreja e Veriut ka dërguar trupa në Rusi, pasi shefi i spiunazhit të Koresë së Jugut u tha ligjvënësve jugokoreanë se 3.000 trupa të Koresë së Veriut janë duke u trajnuar me dronë dhe pajisje të tjera, përpara se të vendosen në fushat e betejës në Ukrainë.
Nëse trupat i bashkohen luftës në Ukrainë nga ana e Rusisë, do të jetë “një çështje shumë, shumë serioze”, tha Austin, duke shtuar se do të kishte një ndikim në Evropë dhe në rajonin Indo-Paqësor.
Inteligjenca e Koresë së Jugut publikoi fillimisht raportet se këtë muaj, marina ruse kishte marrë 1.500 trupa të luftës speciale të Koresë së Veriut në Rusi, ndërsa presidenti ukrainas, Volodymyr Zelenskyi, kishte thënë më herët se qeveria e tij kishte informacione se 10.000 ushtarë të Koresë së Veriut po përgatiteshin për t'iu bashkuar forcave pushtuese ruse, njofton AP.
SHBA dhe NATO nuk e kishin konfirmuar zyrtarisht më parë dërgimin e raportuar të trupave të Koresë së Veriut, por kanë paralajmëruar për rrezikun e një zhvillimi të tillë, nëse është i vërtetë. Rusia dhe Koreja e Veriut deri më tani kanë mohuar lëvizjet e trupave.
Drejtori i Shërbimit Informativ Kombëtar të Koresë së Jugut, Cho Tae-yong, u tha ligjvënësve koreanojugorë të mërkurën se 1.500 trupa të tjera të Koresë së Veriut kanë hyrë në Rusi.