Shefi i Zyrës së Bashkimit Evropian në Kosovë, Aivo Orav, ka bërë të qartë se anëtarësimi i Kosovës dhe Serbisë në BE nuk mund të ndodhë pa një marrëveshje për normalizimin e marrëdhënieve mes dy vendeve.
Ai ka theksuar se procesi i dialogut mes Prishtinës dhe Beogradit nuk është thjesht një opsion, por një kusht i domosdoshëm për integrimin evropian të të dyja palëve.
“Nuk mund ta imagjinoj që Serbia apo Kosova të bëhen pjesë e BE-së pa e normalizuar marrëdhënien mes vete”, ka deklaruar Orav.
Sipas tij, ky proces është kyç për stabilitetin në rajon dhe për të ardhmen evropiane të Kosovës e Serbisë.
Ai ka shtuar se ndihma financiare nga BE-ja është vetëm një instrument për të mbështetur reformat dhe përgatitjen për anëtarësim.
Në lidhje me formimin e qeverisë së re në Kosovë, Orav ka komentuar zvarritjet paszgjedhore, duke thënë se ndonëse procesi mund të zgjasë, më e rëndësishmja është që të respektohet vullneti i qytetarëve.
“Kam dëgjuar ankesa se formimi i qeverisë po merr shumë kohë, por më kryesorja është që zgjedhjet të pasqyrojnë vullnetin e votuesve”, ka thënë ai në një intervistë për televizonin publik.
Orav e ka cilësuar këtë si një element thelbësor për funksionimin e institucioneve dhe për rrugën e Kosovës drejt integrimit evropian./GazetaSinjali/